STRATEJİ PLANLAŞDIRMA VƏ İDARƏETMƏNİN HƏYATA KEÇİRİLMƏSİ

Şəxsiyyətyönümlü təhsil elmlərin ümumi əsaslarının öyrənilməsi üçün uyğun tədris prosesinin təşkil edilməsini və şəffaf idarəolunmasını tələb edir. Təhsil müəssisələrində nəticəyönümlü və şəffaf idarəetmə modelinin yaradılması təhsilin yeni məzmununun öyrənilməsi və strateji cəhətdən keyfiyyətin tam təmin olunmasına istiqamətlənir. Modul ümumi təhsil sistemində müasir məktəbin strateji planlaşdırma və idarəolunma xüsusiyyətlərini və funksiyalarını geniş şəkildə izah edir. Bu modul 4 təlim nəticəsindən ibarətdir. Hər bir təlim nəticəsi üzrə qiymətləndirmə meyarlarının məzmunu açıqlanmış, verilən məzmunun möhkəmləndirilməsi üçün “Tələbələr üçün fəaliyyətlər” və təhsilalanın məzmunu hansı səviyyədə qavradığını qiymətləndirmək üçün “Qiymətləndirmə” bölməsi verilmişdir. İlk təlim nəticəsi strateji inkişaf planının hazırlanmasında xarici təsirlərin rolunu müəyyən edən PESTLE analizinin xüsusiyyətləri, strateji planın hazırlanması üçün yeni mexanizmlərin istifadəsi və müəssisənin inkişafı üzrə prioritet sahələrin qısa və uzunmüddətli planının hazırlanmasına dair məlumatları əks etdirir. İkinci təlim nəticəsi fəaliyyət planının həyata keçirilməsi yolları və fəaliyyət planının icrasına nəzarət üzrə monitorinq və qiymətləndirmə prosesinin şərhindən bəhs edir. Üçüncü təlim nəticəsi müəssisədə müasir idarəetmə mexanizmlərindən istifadə yolları, təhsilalanların müxtəlifliyini (irqi, milli, dini, cinsi, fiziki məhdudiyyət) nəzərə alan səmərəli tədris prosesinin təşkili və idarəetmədə qabaqcıl beynəlxalq təcrübələrdən istifadə yollarından bəhs edir. Dördüncü təlim nəticəsi pedaqoji işçilərin peşəkarlıq səviyyəsinin yüksəldilməsi məqsədilə təlim ehtiyaclarının müəyyən edilməsi, müəssisədə idarəetmənin təkmilləşməsinə xidmət edən pedaqoji heyətin peşəkar inkişafı və peşəkar inkişaf üçün təcrübə mübadiləsinin aparılması yollarını izah edir. Əziz təhsilalanlar! Unutmayın ki, gələcək fəaliyyətinizin yüksək səviyyədə qurulmasının əsası, sizə təqdim edilən materialların həm nəzəri, həm də praktiki mənimsənilməsindən çox asılıdır.