MALİYYƏ-TƏSƏRRÜFAT İŞLƏRİNİN İDARƏ EDİLMƏSİ

Ümumi təhsil müəssisələrində maddi-texniki baza və infrastruktur normativlərinin və maliyyə-təsərrüfat işlərinin idarə edilməsi sahəsində yeni qaydalar, fəaliyyətlər və iş məsuliyyəti təhsilin keyfiyyətli idarə olunmasının əsas şərtlərindən biridir. Təqdim olunan modula maliyyə-təsərrüfat işlərinin idarə edilməsi üzrə təhsil sisteminin maddi-texniki bazasının müasirləşdirilməsi və yeni şəraitin yaradılması yolları daxil edilmişdir. Bu modul 2 təlim nəticəsini əhatə edir və modulda hər bir təlim nəticəsi üzrə qiymətləndirmə meyarlarının məzmunu açıqlanmış və verilən məzmunun möhkəmləndirilməsi üçün “Tələbələr üçün fəaliyyətlər” və təhsilalanın məzmunu hansı səviyyədə qavradığının qiymətləndirilməsi üçün Qiymətləndirmə” bölməsi verilmişdir. İlk təlim nəticəsi maliyyə işlərinə rəhbərlik etmə yolları haqqındadır. Burada təhsil müəssisəsinin qeydiyyatında olan maliyyə vəsaitindən səmərəli istifadə yolları və mühasibatlıq məsələlərinə daimi nəzarətin təmin olunması üsulları təqdim edilir. Məktəblərdə maliyyə müstəqilliyinin yaradılması və maliyyə vəsaitinin səmərəli istifadə yolları izah edilir və mühasibatlıq məsələlərinə daimi nəzarətin təmin olunması üsullarına aydınlıq gətirilir. İkinci təlim nəticəsində məktəblərdə təsərrüfat işlərinə rəhbərlik etmə mexanizmləri təqdim edilir. Bu təlim nəticəsində zəruri avadanlığın uçot-qeydiyyat və mühafizəsi, onlara texniki xidmətin vaxtında həyata keçirilməsinin təmin olunması, müəssisənin təmir və təchizat üzrə ehtiyaclarının müəyyən edilməsi, tədris müəssisəsinin maddi-texniki bazasının məqsədyönlü istifadəsi, təlim prosesində avadanlıq və vasitələrdən səmərəli istifadə yollarının izah edilməsi və müəssisənin ümumi sanitariya-gigiyena tələbləri əsasında təmin olunması qaydaları təqdim edilir.
Əziz təhsilalanlar! Unutmayın ki, gələcək fəaliyyətinizin yüksək səviyyədə qurulmasının əsası sizə təqdim edilən materialların həm nəzəri, həm də praktiki mənimsənilməsindən çox asılıdır.