KİMYANIN TƏDRİSİNDƏ SİNİFDƏNXARİC İŞLƏRİN TƏŞKİLİ

Hazırda ümumtəhsil məktəblərində digər fənlərlə yanaşı kimyanın tədrisində də fənn kurikulumları ilə tədrisin aparılması müəllimlər qarşısında şagirdlərin fəallıqlarını, müstəqil bilik qazanma bacarıqlarını, yaradıcılıq və tədqiqatçılıq qabiliyyətlərini inkişaf etdirən təlim mühiti yaratmaq tələbi qoyur.
Hesab edirik ki, ənənəvi təhsildə kimya fənni üzrə təlim-tərbiyə işinin ayrılmaz bir hissəsi kimi nəzərdə tutulan təlimin köməkçi formalarından müasir təhsildə də məqsədyönlü istifadə edilməsi yuxarıda sadalanan keyfiyyətlərə malik gənclərin yetişdirilməsi üçün faydalı olar.Sinifdənxaric işlər kimya təlimi təşkilinin köməkçi formalarından biri olmaqla, şagirdlərin dərsdən sonrakı vaxtlarının səmərəli təşkil edilməsinə, onların yaradıcılıq qabiliyyət-lərinin, məntiqi təfəkkürlərinin inkişaf etməsinə, kimyadan proqram materiallarını ətraflı mənimsəmələrinə şərait yaratmaqla bərabər, məktəbliləri müstəqil bilik qazanmağa, sərbəst fikir söyləməyə, elmipraktik tədbirlərin təşkilatçısı, lideri olmağa hazırlayır . Müasir dövrün tələblərinə uyğun olaraq gənclərin tədqiqatçı, yaradıcı, gələcəyin qurucuları kimi yetişmələri üçün yalnız dərs vaxtı əldə etdikləri bilik və bacarıqlar kifayət etmir. Sinfin bütün şagirdləri eyni səviyyədə olmadığından, yaxşı oxuyanların marağı və tələbatına uyğun məlumatların verilməsi üçün vaxt ayırmaq mümkün olmur.